போதைப்பொருள்கள் விற்பனை அதிகரிக்க இராணுவத்தினர்தான் பிரதான காரணம்
“வடக்கு மாகாணத்தில் போதைப்பொருள்கள் விற்பனை அதிகரிக்க இராணுவத்தினர்தான் பிரதான காரணம். பொலிஸாரும் அதற்கு உடந்தையாகச் செயற்படுகின்றார்கள்.” – என்று தமிழ்த் தேசிய மக்கள் முன்னணியின் தலைவரும் யாழ்ப்பாணம் மாவட்ட நாடாளுமன்ற உறுப்பினருமான கஜேந்திரகுமார் பொன்னம்பலம் குற்றஞ்சாட்டினார்.
நாடாளுமன்றத்தில் இன்று புதன்கிழமை நடைபெற்ற வரவு – செலவுத் திட்டத்தின் இரண்டாம் வாசிப்பு மீதான விவாதத்தில் உரையாற்றிய அமைச்சர் சந்திரசேகர், வடக்கு, கிழக்கின் கல்வி நிலை மற்றும் போதைப்பொருள் மாபியாக்கள் பற்றி கருத்துக்களை வெளியிட்டார்.
இதன்போது எழுந்த கஜேந்திரகுமார் எம்.பி.,
“வடக்கில் கடந்த ஏழு மாதங்களாக கல்வி நிலை மேம்பட்டுள்ளது எனச் சொன்னீர்கள். இதனை ஆதாரபூர்வமாக வெளிப்படுத்துங்கள்.வடக்கில் போதைப்பொருள்கள் விற்பனை அதிகரிக்க இராணுவத்தினர்தான் பிரதான காரணம். பொலிஸாரும் அதற்கு உடந்தையாகச் செயற்படுகின்றார்கள். எனவே, வடக்கிலிருந்து இராணுவத்தினர் எப்போது வெளியேற்றப்படுவார்கள்?” – என்று கேட்டார்.
இதற்குப் பதிலளித்த அமைச்சர் சந்திரசேகர்,
“போதைப்பொருளுக்கு பின்னால் இராணுவமும் பொலிஸும் உள்ளது எனக் குற்றஞ்சாட்டினீர்கள். அதில் உண்மை உள்ளது. ஆனால், இராணுவத்தினரும் பொலிஸாரும் வேறாக இல்லை. அங்குள்ள மாபியாக்களுடன் அவர்கள் இணைந்துள்ளனர். அந்த மாபியாக்களுடன் தமிழ் அரசியல்வாதிகளும் பிணைந்துள்ளனர். அவ்வாறானவர்கள் கைது செய்யப்பட்டும் உள்ளனர்.” – என்றார்.
ஆனால், வடக்கிலிருந்து இராணுவ வெளியேற்றம் குறித்து அமைச்சர் சந்திரசேகர் நேரடிப் பதிலை வழங்கவில்லை.
வடக்கில் இராணுவத்தினர், பொலிஸார் போதைப்பொருள் விடயத்தில் சம்பந்தப்பட்டிருப்பதை அமைச்சர் சந்திரசேகர் ஒப்புக்கொண்டதை வரவேற்கின்றேன் என்று கஜேந்திரகுமார் எம்.பி. இதன்போது குறிப்பிட்டார்.
இராணுவத்தைப் பொறுப்புக்கூற வைக்காமல், மாபியாக்களை ஒழிக்க முடியாது என்றும் கஜேந்திரகுமார் எம்.பி. சுட்டிக்காட்டினார்.
இதற்குப் பதிலளித்த அமைச்சர் சந்திரசேகர்,
“ஒட்டுமொத்த இராணுவத்தினர் மற்றும் ஒட்டுமொத்த பொலிஸார் மீது நான் பழிசுமத்தவில்லை. ஓரிருவரைப் பற்றித்தான் குறிப்பிடுகின்றேன். மாபியாக்களின் பின்னால் தமிழ் அரசியல்வாதிகள் உள்ளனர் என்பதை மறந்துவிடக்கூடாது.” – என்றார்
இலங்கையின் முக்கிய செய்திகள் – 13.11.2025 | Sri Lanka Tamil News
போதைப்பொருளை விற்பனை செய்வதில் இராணுவம், பொலிஸ் ஈடுபடவில்லையாம்.
“வடக்கு மாகாணத்தில் போதைப்பொருள்கள் வியாபாரத்தில் இராணுவத்தினரும், பொலிஸாரும் ஈடுபடவில்லை. ஆதாரமற்ற குற்றச்சாட்டுக்களை முன்வைப்பதை நாடாளுமன்ற உறுப்பினர் கஜேந்திரகுமார் பொன்னம்பலம் தவிர்த்துக்கொள்ள வேண்டும்.”
இவ்வாறு பாதுகாப்பு பிரதி அமைச்சர் மேஜர் ஜெனரால் (ஓய்வு நிலை) அருண ஜயசேகர தெரிவித்தார்.
நாடாளுமன்றத்தில் இன்று புதன்கிழமை நடைபெற்ற 2026 ஆம் ஆண்டுக்கான வரவு – செலவுத் திட்டத்தின் இரண்டாம் வாசிப்பு மீதான நான்காம் நாள் விவாதத்தில் உரையாற்றுகையிலேயே அவர் மேற்கண்டவாறு குறிப்பிட்டார்.
அங்கு அவர் மேலும் உரையாற்றுகையில், “வடக்கில் போதைப்பொருள் வியாபாரத்தில் இராணுவத்தினரும், பொலிஸாரும் ஈடுபடுகின்றனர் என்று நாடாளுமன்ற உறுப்பினர் கஜேந்திரகுமார் பொன்னம்பலம் குறிப்பிடுகின்றார். அவ்வாறு முறையற்ற வகையில் செயற்படும் இராணுவத்தினர், பொலிஸார் யார், அவர்களின் சேவை பிரதேசம் தொடர்பான விவரங்களை அவர் வெளிப்படுத்த வேண்டும். அவ்வாறு குறிப்பிட்டால் ஆராய்ந்து பார்ப்போம். இவர் குறிப்பிடுவதைப் போன்று பாதுகாப்புத் தரப்பினர் போதைப்பொருள் வியாபாரத்துடன் தொடர்புபடவில்லை.
கடந்த காலங்களில் அரசுகள் எடுத்த தவறான தீர்மானங்களினால் நாட்டு மக்கள் பொருளாதார ரீதியில் மிக மோசமாகப் பாதிக்கப்பட்டார்கள். அரச நிதி முறையற்ற வகையில் பயன்படுத்தப்பட்டதால் நாடும் வங்குரோத்து நிலையடைந்தது.
தேசிய மக்கள் சக்தி மக்களுக்கு வழங்கிய வாக்குறுதிகளை சிறந்த முறையில் செயற்படுத்தி வருகின்றது. எதிர்க்கட்சியினர்தான் கலக்கமடைந்து போலியான குற்றச்சாட்டுக்களை முன்வைத்துக் கொண்டிருக்கின்றார்கள்.
கடந்த கால அரசுகள் பிணைமுறி மோசடி, தேங்காய் எண்ணெய் மோசடி, சீனி மோசடி, வெள்ளைப் பூண்டு உட்பட பாரதூரமான மோசடிகளால்தான் பிரபல்யமடைந்தன.
பொருளாதாரத்துக்குப் பாதிப்பு ஏற்படாத வகையில் 2026 ஆம் ஆண்டுக்கான வரவு – செலவுத் திட்டத்தைத் தயாரித்துள்ளோம். நிதி ஒழுக்கம் தற்போது கடுமையான முறையில் பேணப்படுகின்றது. கடந்த காலங்களைப் போன்று முறையற்ற வகையில் வரவு – செலவுத் திட்டத்தைத் தயாரிக்கவில்லை. மக்களுக்கு போலியான நிவாரணங்களை வழங்கும் வாக்குறுதிகளை வழங்கவில்லை. மக்களுக்கு சாதகமான முறையில் தான் இந்த வரவு – செலவுத் திட்டம் தயாரிக்கப்பட்டுள்ளது.” – என்றார்.
போதைப்பொருள்கள் விற்பனை அதிகரிக்க இராணுவத்தினர்தான் பிரதான காரணம்
