சர்ச்சையாகும் நடிகை கஸ்தூரி பேச்சு!
கோவை பாலியல் வன்கொடுமை விவகாரத்தில் பாதிக்கப்பட்ட மாணவியையும் பொறுப்பாக்கிய கஸ்தூரி பேச்சு பெரும் சர்ச்சையை ஏற்படுத்தி விமர்சனங்களை தூண்டியுள்ளது. அவரது பேச்சு சமூகத்தில் விமர்சனத்தை தூண்டியுள்ளது.
கோவையில் மாணவி கூட்டு பாலியல் வன்கொடுமை செய்யப்பட்ட விவகாரத்திற்கு அந்த மாணவியும்தான் பொறுப்பு என பாஜக நிர்வாகியும் நடிகையுமான கஸ்தூரி பேசியிருப்பது சர்ச்சைக்கு வித்திட்டுள்ளது.
கோவை விமான நிலையம் அருகே, கடந்த 2 ஆம் தேதி காரில் இருந்தபடி ஆண் நண்பருடன் கல்லூரி மாணவி ஒருவர் பேசிக் கொண்டிருந்தபோது, ஆண் நண்பரை தாக்கிய 3 பேர் கொண்ட கும்பல், மாணவியை கூட்டு பாலியல் வன்கொடுமை செய்த சம்பவம் தமிழ்நாட்டை உலுக்கியது.
இதற்கு, அனைத்து தரப்பில் இருந்தும் கண்டனங்கள் எழுந்த நிலையில், சம்பவத்தில் ஈடுபட்ட 3 பேர் கைது செய்யப்பட்டதாக கோவை காவல்துறை தெரிவித்துள்ளது.
இந்நிலையில், சென்னை கே.கே. நகரில், பாஜக கலை மற்றும் கலாச்சார பொதுக்குழு கூட்டம் நடைபெற்றது. இதில் கலந்து கொண்ட பிறகு செய்தியாளர்களை சந்தித்த அக்கட்சியின் நிர்வாகியும், நடிகையுமான கஸ்தூரி, கோவையில் கல்லூரி மாணவி கூட்டு பாலியல் வன்கொடுமை செய்யப்பட்ட விவகாரம் குறித்து பேசினார். அப்போது, பாலியல் வன்கொடுமைக்கு பாதிக்கப்பட்ட மாணவியும், அவரது ஆண் நண்பரும் ஒரு காரணம் என்றார்.
எந்த பெண் மட்டுமல்ல, எந்த இளைஞரும் இரவு நேரத்தில் இருட்டான தனி இடத்துக்கு போகக் கூடாது என பாஜக நிர்வாகி கஸ்தூரி தெரிவித்துள்ளார். அமர காதலாகவே இருந்தாலும், ராத்திரியில் தேவையில்லாத இடத்திற்கு போவது தவறு என்றும் கஸ்தூரி கூறினார்.
“எத்தனையோ பெற்றோர்கள் வாயைக் கட்டி வயிற்றைக் கட்டி கனவுகளோடு உங்களை படிக்க அனுப்புகிறார்கள். படிக்க போ என்று சொன்னால் நீங்கள் செய்வது என்ன? நான் சொல்வது பெண்ணியத்திற்கு எதிரானது என்று சொன்னால் அந்தப் பெண்ணியமே வேண்டாம்.” என்றும் கஸ்தூரி பேசினார்.
பாதிக்கப்பட்ட மாணவிக்கு எதிராக நடிகை கஸ்தூரி பேசியிருப்பது சர்ச்சையாகியுள்ளது. கஸ்தூரியின் கருத்து பிற்போக்குத் தனமானது என்றும், பாதிக்கப்பட்ட பெண்ணுக்கு எதிரான கருத்து என பலரும் விமர்சித்து வருகின்றனர்.
இலங்கையின் முக்கிய செய்திகள் – 09.11.2025 | Sri Lanka Tamil News
