திருகோணமலையில் நேற்று நடந்தது என்ன? பொதுமக்கள் பாதுகாப்பு அமைச்சர் விளக்கம்
“திருகோணமலை கடற்கரையை அண்டிய பகுதியில் நேற்றிரவு வைக்கப்பட்ட புத்தர் சிலை பாதுகாப்புக் காரணங்களுக்காகவே அங்கிருந்து பொலிஸாரால் அகற்றப்பட்டது. இன்று அதே இடத்தில் மீண்டும் புத்தர் சிலை வைக்கப்படும். திருகோணமலையில் அமைதியின்மை ஏற்பட இடமளிக்க முடியாது. சட்டம், ஒழுங்கை நிலைநாட்ட உரிய நடவடிக்கை எடுக்கப்பட்டுள்ளது.”
இவ்வாறு பொதுமக்கள் பாதுகாப்பு அமைச்சர் ஆனந்த விஜேபால, நாடாளுமன்றத்தில் இன்று முற்பகல் விளக்கமளித்தார்.
அவர் மேலும் தெரிவிக்கையியல்,
“குறித்த பகுதியில் குழப்பம் ஏற்பட்டால் புத்தர் சிலைக்குச் சேதம் ஏற்படக்கூடும் எனத் தகவல் கிடைத்தது. இதனையடுத்து நேற்றிரவு பொலிஸார் புத்தர் சிலையை அங்கிருந்து அகற்றி, சிலைக்குரிய பாதுகாப்பை உறுதிப்படுத்தினர்.
இன்று அந்தப் புத்தர் சிலையை குறித்த விகாரையில் வைக்குமாறு பொலிஸாருக்கு உத்தரவிட்டுள்ளோம். அத்தோடு பாதுகாப்பு பலப்படுத்தப்பட்டுள்ளது.
இதேவேளை, கரையோரப் பாதுகாப்புத் திணைக்களத்தால், அங்கு சட்டவிரோதமாக நடத்தப்படும் கடை ஒன்று தொடர்பிலும் முறைப்பாடு செய்யப்பட்டுள்ளது.
அது தொடர்பில் பொலிஸார் நீதிமன்ற நடவடிக்கையில் ஈடுபட்டுள்ளனர். நீதிமன்றத் தீர்ப்பின்படியே செயற்பட வேண்டியுள்ளது.
காணி குறித்து நீதிமன்றம் வழங்கும் உத்தரவுக்கமையவே நடவடிக்கை எடுக்கப்படும்.
இதற்குப் பின்னர் திருகோணமலையில் எந்தப் பிரச்சினையும் நடப்பதற்கான சாத்தியங்கள் இல்லை.” – என்றார்.
