திருகோணமலையில் பதற்றம்: மீண்டும் இனவாதமா?

திருகோணமலையில் பதற்றம்: மீண்டும் இனவாதமா?

திருகோணமலை கடற்கரைப் பகுதியில் புத்த விகாரையொன்றை நிர்மாணிப்பதற்கான பணிகள் இன்று ஆரம்பிக்கப்பட்டுள்ளமை சமூக ஊடகங்களில் பெரும் சர்ச்சையை ஏற்படுத்தியுள்ளது.

அனுமதியின்றி இந்நிர்மாண வேலைகள் ஆரம்பிக்கப்பட்டுள்ளதாகக் கூறி பிரதேச இளைஞர்கள் சிலர் அங்கு சென்றிருந்த நிலையில் அவர்கள் மிரட்டப்பட்டதாக தெரிவிக்கப்பட்டுள்ள நிலையில், இது தொடர்பில் பல்வேறு தகவல்கள் வெளியாகிய வண்ணமுள்ளன.
மேலும், அங்கு சென்றிருந்த ஊடகவியலாளரும் மிரட்டப்பட்டதாக தெரிவிக்கப்பட்டுள்ளது.

தற்போது வேலைகள் தற்காலிகமாக நிறுத்தப்பட்டுள்ளதாகவும், அங்கிருந்தவர்கள் பொலிஸாரையும் அங்கிருந்து செல்லும்படியும், அங்கு சென்ற தம்மையும் தாக்க முற்பட்டதாகவும் குறித்த சம்பவ இடத்திற்குச் சென்ற இளைஞர் ஒருவர் தெரிவித்துள்ளார்.

அத்தோடு, இவ்விகாரம் தொடர்பில் வெளிநாட்டலுவல்கள் மற்றும் வெளிநாட்டு வேலைவாய்ப்பு பிரதி அமைச்சர் அருண் ஹேமச்சந்திராவின் கவனத்துக்கு கொண்டு செல்லப்பட்டுள்ளதாகவும், அவர் இது தொடர்பில் உடனடி நடவடிக்கைக்கு உத்தரவாதமளித்துள்ளதாகவும் தெரிவிக்கப்பட்டுள்ளது.

எனினும், இது தொடர்பில் நடவடிக்கை எடுக்க வேண்டிய உள்ளூராட்சி அமைப்பு அக்கறையின்றி இருப்பதாகவும் குற்றச்சாட்டுக்கள் எழுந்துள்ளன.

இவ்விவகாரம் இவ்வாறு இருக்கையில், இதன் நிர்மாணத்தோடு தொடர்புடைய தரப்பினர் தமது தரப்பு நியாயங்களையும், முன்வைத்துள்ளனர்.

அவர்களின் கருத்துப்படி,
திருகோணமலை மாவட்டத்தில் தொடங்கப்பட்ட முதல் தர்ம பாடசாலையான ஸ்ரீ சம்புத்த ஜயந்தி போதி வதர்னவை மீண்டும் ஆரம்பிப்பதற்காக, மிஹிந்துபுர மகிந்தவம்ச குணானுஸ்மரண தர்மப் பள்ளி கட்டிடத்திற்கான அடிக்கல் நாட்டு விழா 2025.11.16 ஞாயிற்றுக்கிழமை காலை 09.09 மணிக்கு திருகோணமலைப் பிரதேசத்தில் உள்ள சங்கைக்குரிய மகா சங்கத்தினரின் முன்னிலையில் இடம்பெற்றுள்ளது.
1951 ஆம் ஆண்டு நிர்மாணிக்கப்பட்ட இந்த விகாரையின் நிறுவனர் மறைந்த வடலபிட்டியே ஷாந்த நாயக ஹிமி ஆவார். இந்திய இராணுவத்தின் படையெடுப்புக்குப் பின்னர், இந்த விகாரை மற்றும் அதனுடன் இணைந்திருந்த தர்ம பாடசாலை செயற்படாமல் போனது. பின்னர், 1996 ஆம் ஆண்டு, அவை திருகோணமலையில் உள்ள பிரெட்ரிக் கோட்டைக்கு அருகிலுள்ள பௌத்த மையத்தின் வளாகத்துக்கு மாற்றப்பட்டன.
2001 ஆம் ஆண்டளவில், ஸ்ரீ சம்புத்த ஜயந்தி போதி வர்த்தன தர்ம பாடசாலை (53/15/දහ/லி/6345) திருகோணமலையில் மிகப் பிரசித்திபெற்ற தர்ம பாடசாலைகளில் ஒன்றாக மாறியது. இங்கு 200க்கு மேற்பட்ட மாணவர்கள் கல்வி கற்றனர். இருப்பினும், 2004 டிசம்பர் மாத சுனாமி பேரழிவுக்குப் பின்னர் அது மூடப்பட்டது. சுனாமியின் விளைவாக சம்புத்த ஜயந்தி விகாரையின் பழைய கட்டிடமும் முற்றிலுமாக சேதமடைந்தது.
உள்நாட்டுப் போராட்டங்களும் பல்வேறு சவால்களும் காரணமாக, சம்புத்த ஜயந்தி விகாரை மற்றும் தர்ம பாடசாலை மீண்டும் ஆரம்பிக்க முடியாமல் இருந்தது. இன்றோ, பக்தர்களின் ஒத்துழைப்பும் ஆதரவையும் பெற்று இந்த புனித நிகழ்ச்சி வெற்றிகரமாக நடத்தப்பட்டது.என்று கூறப்பட்டுள்ளது.