கனமழை எச்சரிக்கை

கனமழை எச்சரிக்கை
நாட்டின் 08 மாவட்டங்களுக்கு மண்சரிவு அபாய எச்சரிக்கை விடுக்கப்பட்டுள்ளது.

அதன்படி, பதுளை, கேகாலை ஆகிய மாவட்டங்களுக்கு முதலாம் நிலை மண்சரிவு அபாய எச்சரிக்கை விடுக்கப்பட்டுள்ளதாகத் தேசிய கட்டட ஆய்வு நிறுவகம் தெரிவித்துள்ளது.

அத்துடன், களுத்துறை, கண்டி, குருநாகல், மொனராகலை மற்றும் நுவரெலியா ஆகிய மாவட்டங்களுக்கு இரண்டாம் நிலை மண்சரிவு அபாய எச்சரிக்கை விடுக்கப்பட்டுள்ளதாக அறிவிக்கப்பட்டுள்ளது.

நிலவும் மழையுடனான வானிலைக் காரணமாக மண்சரிவு, நிலம் தாழிறக்கம், கற்பாறைகள் சரிந்து வீழ்தல் போன்ற அபாயங்கள் தொடர்பில் அவதானத்துடன் செயற்படுமாறும் பொதுமக்கள் வேண்டப்படுகின்றனர்.

இதேவேளை வடக்கு மற்றும் கிழக்கு மாகாணங்களில் சுமார் 100 மில்லிமீற்றர் வரையான பலத்த மழை பெய்யக்கூடும் என வளிமண்டலவியல் திணைக்களம் எதிர்வு கூறியுள்ளது.

நாட்டின் ஏனைய பகுதிகளில் 75 மில்லிமீற்றர் வரையான ஓரளவு பலத்த மழை பெய்யக்கூடும் எனவும் அறிவிக்கப்பட்டுள்ளது.

இதனிடையே, இரத்தினபுரி மாவட்டத்தில் தொடரும் மழை காரணமாக, இரத்தினபுரி, குருவிட்ட, எலபாத்த, கிரியெல்ல, பெல்மடுல்ல, கஹவத்தை, இறக்குவானை, பலாங்கொடை மற்றும் கல்தோட்ட ஆகிய பகுதிகளில் பல வீதிகள் நீரில் மூழ்கியுள்ளன.

அத்துடன், தாழ்நிலப் பகுதிகளில் வயல் வெளிகள் மற்றும் இரத்தினக்கல் அகழும் கிடங்குகள் மற்றும் இரத்தினக்கல் அகழும் சுரங்கங்களும் நீரில் மூழ்கியுள்ளதாக எமது செய்தியாளர் தெரிவித்தார்.

இன்றைய ராசிப்பலன் – 18.11.2025