மன்னாரில் போக்குவரத்து முற்றிலும் தடை!

வடக்கு மாகாண நீர்ப்பாசனத் திணைக்களத்தின் ஆளுகைக்கு உட்பட்ட 54 மிகப்பெரிய மற்றும் நடுத்தர நீர்ப்பாசனத் திட்டங்களில், நேற்று மாலை வரையான அவதானிப்பின்படி, 51 குளங்கள் வான் பாயும் நிலையில் காணப்படுவதுடன், ஒரு குளம் 75 சதவீதம் முதல் 100 சதவீதம் வரையிலான நீர் கொள்ளளவை எட்டியுள்ளது.

கிளிநொச்சி இரணைமடு குளத்தின் நீர்மட்டம் பாதுகாப்பான நிலையில் உள்ளது. எனவே, தாழ்நிலப் பகுதிகளில் வசிப்போர் அவதானத்துடன் செயற்பட வேண்டும் என அறிவிக்கப்பட்டுள்ளது.

இந்த நிலையில் முல்லைத்தீவு மற்றும் மன்னார் மாவட்டங்களில் நீர் நிலைகளில் நீர்மட்டம் அதிகரித்து, வான் பாய்ந்துள்ளது. இதனால் குறித்த மாவட்டங்களில் போக்குவரத்து முற்றாகத் தடைப்பட்டுள்ளதாக அந்தந்த மாவட்ட அனர்த்த முகாமைத்துவ அதிகாரிகள் தெரிவித்துள்ளனர்.

அதன்படி, மன்னார் மாவட்டத்திலிருந்து வெளி மாவட்டங்களுக்கான அனைத்து வீதிகளுடனான போக்குவரத்தும் முற்றாகத் தடைப்பட்டுள்ளதாக மன்னார் மாவட்ட அனர்த்த முகாமைத்துவ உதவிப் பணிப்பாளர் கனகரத்தினம் திலீபன் தெரிவித்துள்ளார்.

இந்த நிலையில், மன்னார் கட்டுக்கரை குளத்தின் வான் நீர் வரத்து அதிகரித்துக் காணப்படுவதோடு வான்பகுதி பாதிப்படையும் ஆபத்து இருப்பதாக அறிவிக்கப்பட்டுள்ளது.

அதற்கமைய, பரப்புக்கடந்தான் அடம்பன் தாழ்வுப் பகுதிகளில் வசிக்கும் மக்கள் இது தொடர்பில் அவதானமாக இருப்பதோடு பாதுகாப்பு தேவையின் பொருட்டு பாதுகாப்பான இடங்களை நோக்கிச் செல்லுமாறும் கேட்டுக்கொள்ளப்பட்டுள்ளனர்.

மின்சார இணைப்புகளும் துண்டிக்கப்பட்டுள்ளத்தால் வெளி தொடர்புகளை மேற்கொள்ள முடியாத நிலை காணப்படுவதாக குறிப்பிடப்பட்டுள்ளது. மன்னார் மாவட்டத்திலுள்ள வெளிமருதமடு குளம் மற்றும் கூராய்க்குளம் ஆகியவை உடைப்பெடுத்துள்ள போதிலும், அப்பகுதியில் நிலவும் மின்சாரம் மற்றும் தொலைத்தொடர்பு வலையமைப்புப் பிரச்சினைகள் காரணமாக இது தொடர்பான மேலதிக விவரங்களைப் பெற்றுக்கொள்வதில் சிரமம் காணப்படுகிறது.

மேலும், அதிக மழைவீழ்ச்சி காரணமாக வவுனியா மாவட்டத்திலுள்ள பம்பைமடு, வவுனியா குளம், மகாகச்சகொடிய குளம் ஆகியவற்றின் தடுப்பணைகள் உடைப்பெடுத்துள்ளன.

அத்துடன், முல்லைத்தீவு மாவட்டத்திலுள்ள முத்தையன்கட்டு குளத்தின் வான் பாதையிலுள்ள தடுப்பணைகள் உடைப்பெடுத்துள்ளதாக வட மாகாண நீர்ப்பாசன திணைக்களம் அறிவித்துள்ளது.

அதேவேளை, குளங்களின் உடைப்பைத் தடுக்கும் நோக்கில் முன்னெச்சரிக்கை நடவடிக்கையாக வவுனியா மாவட்டத்திலுள்ள கல்மடு, பெரியதம்பனை, அலியாமருதமடு, கனகராயன்குளம் ஆகியவற்றிலும், மன்னார் மாவட்டத்திலுள்ள பெரியமடு குளத்திலும், கிளிநொச்சியிலுள்ள புழுதியாறு, முல்லைத்தீவு மாவட்டத்திலுள்ள வவுனிக்குளம், உடையார்கட்டு, தட்டயர்மலை ஆகிய குளங்களின் வால்கட்டுப் பகுதிகள் வெட்டப்பட்டு நீர்மட்டம் குறைக்கப்பட்டு வருவதுடன், குளங்களின் பாதுகாப்பு தொடர்பான தொடர் நடவடிக்கைகள் மேற்கொள்ளப்பட்டு வருகின்றன.

இதேவேளை, யாழ். மாவட்டத்தின் தொண்டைமானாறு, அரியாலை மற்றும் அராலி ஆகிய உவர்நீர்த்தடுப்பணைகளை ஒட்டிய கடல் மட்டமானது 3 அடி 6 அங்குலம் வரை உயர்ந்துள்ளதால், தடுப்பணைக் கதவுகளைத் திறந்து நீரை வெளியேற்ற முடியாத நிலை காணப்படுவதாக, வட மாகாண நீர்ப்பாசன திணைக்களம் அறிவித்துள்ளது.

இந்த நிலையில் களனி ஆற்றின் நீர் மட்டம் வெகுவாக அதிகரித்து அபாயகர வெள்ள நிலையை அடைந்துள்ளது.

இதனால் களனி ஆற்றின் இருமருங்கிலும் வசிக்கும் மக்களை பாதுகாப்பான இடங்களுக்கு உடனடியாக செல்லுமாறு கோரிக்கை விடுக்கப்பட்டுள்ளது.

மக்களே அவதானம்