தமிழ்நாட்டில் இன்று 4 மாவட்டங்களில் கனமழை!

தமிழ்நாட்டில் பல்வேறு பகுதிகளில் வடகிழக்கு பருவமழை தீவிரமடைந்து வரும் நிலையில், வங்கக் கடலில் நாளை புயல் உருவாக வாய்ப்பு உள்ளதாக வானிலை மையம் எச்சரித்துள்ளது.

தூத்துக்குடி மாவட்டம் கோவில்பட்டி, கடம்பூர், வண்டானம் உள்ளிட்ட பகுதிகளில் 2 நாட்களாக விட்டு விட்டு பெய்த தொடர் மழையால் குடியிருப்பு பகுதிகளில் வெள்ளம் தேங்கியது. நாகப்பட்டினம் சுற்றுவட்டாரப் பகுதியில் பெய்த தொடர் மழையால் பிரசன்ன வெங்கடாஜலபதி கோயிலில் வெள்ள நீர் புகுந்து மக்கள் அவதிக்குள்ளாகினர்.

அதேபோல், கீழ்வேளூர், கீழையூர், வலிவலம், கொடியாலத்தூர் உள்ளிட்ட கிராமங்களில் விளை நிலங்களை வெள்ள நீர் சூழ்ந்தது. கள்ளக்குறிச்சி மாவட்டம் தியாகதுருகம், வடதொரசலூர், கலையநல்லூர், பல்லகச்சேரி, விருகாவூர் உள்ளிட்ட பகுதிகளில் கனமழை பெய்தது. கரூர் மாவட்டத்தின் தான்தோன்றிமலை, பசுபதிபாளையம், வேலுச்சாமிபுரம், காந்தி கிராமம் உள்ளிட்ட பகுதிகளில் இரவில் மழை கொட்டித் தீர்த்தது.

கன்னியாகுமரி மாவட்டத்தில் தொடர் மழை காரணமாக பேச்சிப்பாறை அணையின் நீர் மட்டம் 44 அடியை எட்டிய நிலையில் உபரி நீர் திறப்பால் கோதையாற்றில் கடும் வெள்ளப்பெருக்கு ஏற்பட்டுள்ளது. சேலம் மாவட்டம், ஆத்தூர் அடுத்த கல்வராயன்மலைப் பகுதியில் பெய்த மழையால், ஆணைவாரி நீர் வீழ்ச்சியில் தண்ணீர் ஆர்ப்பரித்துக் கொட்டுவதால் சுற்றுலா பயணிகளுக்கு அனுமதி மறுக்கப்பட்டது.

மேற்கு தொடர்ச்சி மலை பகுதிகளில் பெய்து வரும் தொடர் கனமழை காரணமாக தென்காசி மாவட்டத்தில் குற்றால அருவிகளில் வெள்ளம் ஆர்ப்பரித்துக் கொட்டியதால் சுற்றுலா பயணிகளுக்கு தடை விதிக்கப்பட்டது. அதேபோல், ஸ்ரீவில்லிபுத்தூர், செண்பகத்தோப்பு மீன் வெட்டிப் பாறை அருவியில் கடும் வெள்ளப்பெருக்கு ஏற்பட்டதால் மக்கள் குளிக்க அனுமதி மறுக்கப்பட்டது. தேனி மாவட்டத்தில் உள்ள சுருளி அருவி, திருப்பூர் மாவட்டம் திருமூர்த்திமலை பஞ்சலிங்க அருவிகளிலும் வெள்ளப்பெருக்கு காரணமாக குளிப்பதற்கு தடை விதிக்கப்பட்டது.

இதனிடையே, வங்கக் கடலில் நிலவும் ஆழ்ந்த காற்றழுத்த தாழ்வு பகுதி இன்று வலுவடைந்து, நாளை புயலாக மாறும் என வானிலை ஆய்வு மைய தென்மண்டலத் தலைவர் அமுதா தெரிவித்துள்ளார். மேலும் குமரிக்கடல் மற்றும் இலங்கை தெற்கு வங்க கடல் பகுதிகளில் இன்று புதிதாக ஒரு காற்றழுத்த தாழ்வு பகுதி உருவாகும் வாய்ப்பு இருப்பதாக கூறிய அவர், வடகிழக்கு பருவமழை இயல்பான அளவு இருக்கும் என குறிப்பிட்டார்.

இந்நிலையில், கன்னியாகுமரி, திருநெல்வேலி, தூத்துக்குடி, ராமநாதபுரம் மாவட்டங்களில் இன்று கனமழை பெய்யக் கூடும் என வானிலை மையம் எச்சரித்துள்ளது. அதைத் தொடர்ந்து நாளை மற்றும் நாளை மறுநாள் தூத்துக்குடி, ராமநாதபுரம், புதுக்கோட்டை, திருவாரூர், தஞ்சாவூர், நாகப்பட்டினம் மாவட்டங்களிலும் கன மழை பெய்யும் என தெரிவிக்கப்பட்டுள்ளது. நவம்பர் 28 ஆம் தேதி தஞ்சை, திருவாரூர், நாகையில் மிக கனமழையும், 29 ஆம் தேதி மயிலாடுதுறை, கடலூர், விழுப்புரம், செங்கல்பட்டு, சென்னை, காஞ்சிபுரம், திருவள்ளூரில் மிக கன மழை எச்சரிக்கையும் விடுக்கப்பட்டுள்ளது.

டெல்லியில் காற்று மாசு அதிகரிப்பு