விஜயகாந்த் மறைவிற்கு செல்லாதது ஏன்? – நடிகர் வடிவேலு
தமிழ் சினிமாவில் நகைச்சுவை ஜாம்பவானாக பல கோடி மக்கள் நெஞ்சங்களில் நிலைத்து நிற்பவர் வைகைப்புயல் வடிவேலு. நகைச்சுவை நடிகர்களாக செந்தில், கவுண்டமணி கோலோச்சிய காலகட்டத்தில் சத்தமே இல்லாமல் தமிழ் சினிமாவில் நுழைந்து சரவெடியாய் தனது நகைச்சுவை மூலம் மக்களை மிரளவைத்தார்.
முகபாவனை, கவுண்டர், நடிப்பு என நகைச்சுவைக்கென தனி உடல் மொழியை உருவாக்கியவர் வடிவேலு. தனது நகைச்சுவை வளத்தால் தமிழ் சினிமாவையே கட்டிப்போட்டார் என்றால் நிச்சயம் மறுக்க முடியாது. ஹீரோவுக்காக படங்கள் ஓடியது தாண்டி, படத்தில் வடிவேலு நடிக்கிறார் என்பதற்காகவே கூட்டம் கூட்டமாய் மக்கள் திரையரங்குகளில் குவிந்த காலமும் உண்டு. பல படங்கள் அவரால் ஹிட் ஆனதும் உண்டு.
எந்த படம் ரிலீஸ் ஆனாலும், அந்த படத்தில் நிச்சயம் நகைச்சுவை கதாபாத்திரத்தில் வடிவேலு நடித்திருப்பார். அந்த அளவுக்கு தமிழ் சினிமாவில் நடிகர் வடிவேலுவுக்கு மவுசு உச்சத்தில் இருந்தது. நடிப்பில் பின்னி பெடலெடுத்த வடிவேலு தனது குரல் திறனாலும் மக்களை ஈர்த்தார். எட்டணா இருந்தா எட்டுறு போன்ற பாடல்கள் இன்றும் பிரபலம்.
புகழின் உச்சியில் இருந்த வைகைப்புயல் வடிவேலு சில பிரச்னைகள் காரணமாக தமிழ் சினிமாவில் நடிக்க அவருக்கு தடை விதிக்கப்பட்டது. சில ஆண்டுகளாக திரையில் காணாமல் போன வடிவேலுவின் இடத்தை நிரப்ப பலர் வந்த போதிலும், ரசிகர்களின் எதிர்பார்ப்பு வடிவேலு எப்போது மீண்டும் நடிப்பார் என்றுதான் இருந்தது.
அதன் பின் ஒரு வழியாக நாய் சேகர் படத்தின் மூலம் ரீ-என்ட்ரி கொடுத்தார் நகைச்சுவை மன்னன் வடிவேலு. அந்த படம் அவருக்கு கைகொடுக்கவில்லை. அதன் பின் மாரிசெல்வராஜ் இயக்கத்தில் மாமன்னன் படத்தில் இதுவரை ஏற்று நடித்திராத சீரியஸ் கதாபாத்திரத்தில் நடித்த வடிவேலுவுக்கு மாபெரும் வரவேற்பு கிடைத்தது. படமும் ஹிட் அடித்தது.
பலவிதமான விமர்சனங்கள் வடிவேலுவை நோக்கி வீசப்பட்டு வருகிறது. அண்மையில் அவர் பிரபல நடிகர் விஜயகாந்த் மறைவிற்கு வராதது பெரும் பேசுபொருளாக மாறி, பலரும் வடிவேலுவை பலவிதமாக விமர்சித்தது குறிப்பிடத்தக்கது. விஜயகாந்த் உடனான பிரச்சினையின் காரணமாக வடிவேலு சினிமாவில் இருந்து ஒதுங்கி இருந்தாலும், அவர் மறைவுக்கு வந்திருக்கலாம் என்பதே பலரின் கருத்தாக இருந்தது.
விஜயகாந்த் மீதான தனிப்பட்ட பிரச்சினைகளை மறந்துவிட்டு அவருடன் நடித்த அனுபவத்திலாவது அவரின் மறைவுக்கு வந்து கடைசியாக ஒருமுறை வடிவேலு அஞ்சலி செலுத்தியிருக்கலாம் என்றும் பேசப்படுகிறது. இந்நிலையில், விஜயகாந்த் மறைவிற்கு வரமுடியாதது ஏன் என்பது குறித்து வடிவேலு மனம் திறந்துள்ளார். மாரீசன் படத்தின் ஷூட்டிங்கின் போது சக நடிகர் குரு லஷ்மனனிடம் இது தொடர்பாக பகிர்ந்துள்ளார்.
அதில், “மனுஷன் (கேப்டன்) இறந்ததற்கு கூட என்னால் போக முடியல, நான் போயிருப்பேன். போயிருந்தால் எல்லாரும் என்னைத் தவறாகத்தான் பேசியிருப்பார்கள். போகவில்லை என்றாலும் எல்லாரும் என்னைத் திட்டப் போகிறார்கள். என் மனதாரச் சொல்லுகிறேன். அந்த மனுஷன் நிச்சயம் சொர்க்கத்தில் தான் இருப்பார்” என வடிவேலு மனம் திறந்து பேசியதாக நடிகர் குரு லஷ்மனன் தெரிவித்துள்ளார்.
இலங்கையின் முக்கிய செய்திகள் – 22.11.2025 | Sri Lanka Tamil News
