கொழுப்பு கல்லீரல் நோயை குணப்படுத்த மஞ்சள் போதுமா..?
கொழுப்பு கல்லீரல் நோய் ஒரு அமைதியான ஆனால் ஆபத்தான கல்லீரல் பிரச்சனையாக உருவெடுத்து வரும் நிலையில், மஞ்சளில் உள்ள குர்குமின் அழற்சியை குறைத்து கல்லீரல் செயல்பாட்டை மேம்படுத்துவதில் முக்கிய பங்காற்றுவதாக மருத்துவ ஆய்வுகள் உறுதிப்படுத்தி இருக்கின்றன.
மருத்துவர்களால் மது அல்லாத கொழுப்பு கல்லீரல் நோய் (NAFLD) என்று அழைக்கப்படும் கொழுப்பு கல்லீரல் நோய், உலகளவில் வேகமாக அதிகரித்து வரும் ஒரு முக்கிய ஆரோக்கியப் பிரச்சனையாக உருவெடுத்து வருகிறது. கல்லீரல் செல்களில் கொழுப்பு அதிகமாகப் படிவதிலிருந்து தொடங்கும் இந்த நோய், ஆரம்ப கட்டங்களில் எந்தவிதமான தெளிவான அறிகுறிகளுமின்றி அமைதியாக முன்னேறும். சிகிச்சையளிக்காமல் விட்டால் இதுவே வீக்கம், ஃபைப்ரோசிஸ், சிரோசிஸ் மற்றும் முடிவில் கல்லீரல் செயலிழப்புக்கும் வழிவகுக்கலாம்.
உடல் பருமன், இன்சுலின் எதிர்ப்பு, அதிக கொழுப்பு மற்றும் வளர்சிதை மாற்றக் கோளாறுகள் போன்றவை கொழுப்பு கல்லீரல் நோயின் முக்கிய காரணிகளாகக் கருதப்படுகின்றன. இந்த நிலையில், மஞ்சள் மற்றும் அதில் உள்ள முக்கிய மூலப்பொருளான குர்குமின், கல்லீரல் ஆரோக்கியத்தைப் பாதுகாப்பதில் முக்கிய பங்கு வகிப்பதாக ஆய்வுகள் சுட்டிக்காட்டுகின்றன.
மஞ்சள், கொழுப்பு கல்லீரலுக்கு எப்படி உதவுகிறது?
மஞ்சள் (Curcuma longa) சமையலில் பொதுவாக பயன்படுத்தப்படும் மசாலாப் பொருளாக இருந்தாலும், அதன் மருத்துவப் பயன்கள் பல நூற்றாண்டுகளாக இந்திய மற்றும் ஆசியாவின் பாரம்பரிய சிகிச்சை முறைகளில் தொடர்ந்து பயன்படுத்தப்பட்டு வருகின்றன.
அதிலும், மஞ்சளில் உள்ள குர்குமின், பின்வரும் சக்திவாய்ந்த பண்புகளுக்காக மருத்துவ ஆய்வுகளில் கவனம் ஈர்த்துள்ளது.
1. அழற்சியை குறைக்கும்
மது அல்லாத கொழுப்பு கல்லீரல் நோய் (NAFLD) கல்லீரலின் நீண்டகால அழற்சியுடன் தொடர்புடையது. குர்குமின், இந்த அழற்சி பாதைகளைக் கட்டுப்படுத்தி, சேதத்தைத் தடுக்கும்.
2. ஆக்ஸிஜனேற்ற அழுத்தத்தைக் குறைக்கும்
கல்லீரல் செல்களை சேதப்படுத்தும் ‘ஃப்ரீ ரேடிக்கல்கள்’ குர்குமினால் நடுநிலையாக்கப்படுகின்றன. இது கல்லீரல் செல்லின் பாதுகாப்பை பலப்படுத்துகிறது.
3. கொழுப்பு வளர்சிதை மாற்றத்தை மேம்படுத்துகிறது
குர்குமின், கல்லீரலில் கொழுப்பு சேமிப்பைக் குறைத்து, கொழுப்பு எரிக்கும் திறனை மேம்படுத்தும் என்பதை ஆய்வாளர்கள் கண்டறிந்துள்ளனர்.
4. இன்சுலின் உணர்திறனை உயர்த்துகிறது
மது அல்லாத கொழுப்பு கல்லீரல் நோயின் முதன்மை காரணிகளில் ஒன்றான இன்சுலின் எதிர்ப்பு, குர்குமினால் சீராக்கப்படுகிறது. இது ரத்த சர்க்கரை மற்றும் லிப்பிட் அளவுகளை கட்டுப்பாட்டில் வைத்திருக்க உதவும்.
குர்குமின் பற்றிய மருத்துவ ஆய்வுகள் என்ன சொல்கின்றன?
PubMed Central-ல் வெளியிடப்பட்ட பல மருத்துவ பரிசோதனைகள், குர்குமின் மது அல்லாத கொழுப்பு கல்லீரல் நோயாளிகளில் கல்லீரல் ஆரோக்கியத்தை குறிப்பிடத்தக்க அளவில் மேம்படுத்தும் என்பதை காட்டுகின்றன. ஆய்வுகள் படி, குர்குமின்:
– ALT மற்றும் AST போன்ற கல்லீரல் நொதிகளை கணிசமாகக் குறைத்தது
– அல்ட்ராசவுண்ட் மூலம் மதிப்பிடப்பட்ட கல்லீரல் கொழுப்பு அளவில் குறிப்பிடத்தக்க முன்னேற்றத்தை காண முடிந்தது
மேலும், சாதாரண மஞ்சளில் உள்ள குர்குமினைக் காட்டிலும், செறிவூட்டப்பட்ட குர்குமின் சாறு (curcumin extract) பல மடங்கு அதிக பயனுள்ளதாக இருப்பதாக ஆராய்ச்சிகள் தெரிவிக்கின்றன.
பல மருத்துவ சோதனைகள், ஒரு நாளைக்கு 500-1000 mg குர்குமின் என்கிற அளவு பாதுகாப்பானதாகவும், பயனுள்ளதாகவும் இருப்பதாக உறுதிப்படுத்துகின்றன. கூடுதலாக, குர்குமினை கருப்பு மிளகுடன் (piperine) சேர்த்து எடுத்துக் கொண்டால், உடல் அதனை உறிஞ்சும் திறன் 20 மடங்கு அதிகரிக்கும் என்பது குறிப்பிடத்தக்கது.
மஞ்சள் மற்றும் குர்குமினை எப்படி எடுத்துக்கொள்ளலாம்?
மஞ்சள் மற்றும் குர்குமினை உணவில், பாலில் அல்லது கறிகள், சூப்புகள் போன்றவற்றில் சேர்த்துக் கொள்ளலாம். ஆனால், சாதாரண மஞ்சளில் குர்குமின் அளவு மிகக் குறைவாக இருப்பதால், மருத்துவ நன்மைகளைப் பெற அதிக அளவு தேவைப்படும். எனவே, பலர் 500-1000 mg என்கிற அளவில் குர்குமின் எக்ஸ்ட்ராக்ட் வடிவில் சப்ளிமெண்ட்டாக எடுத்துக் கொள்கிறார்கள்.
கருப்பு மிளகு சாறு (piperine) சேர்க்கப்பட்ட குர்குமின், உறிஞ்சுதலை 20 மடங்கு வரை அதிகரிக்கும். லிப்போசோமல் அல்லது பைட்டோசோம் போன்ற மேம்பட்ட வடிவங்கள் உறிஞ்சுதலை மேம்படுத்துகின்றன. எனினும், எந்த சப்ளிமெண்டையும் தொடங்குவதற்கு முன்பாக, குறிப்பாக தினசரி மருந்துகளை எடுத்துக் கொள்பவர்கள், கர்ப்பிணிகள் அல்லது நிலையான உடல்நிலை பிரச்சினைகள் உள்ளவர்கள் போன்றோர் மருத்துவரை அணுகுவது அவசியமாகும்.
கொழுப்பு கல்லீரலுக்கு மஞ்சள் மட்டும் போதுமா?
கொழுப்பு கல்லீரலை தடுக்க மஞ்சள் மட்டுமே போதாது, இது ஒரு கருவி மட்டுமே. NAFLD-யை மாற்றுவதற்கு உண்மையில் முக்கியமானவை வாழ்க்கை முறை மாற்றங்களே. அதாவது, சமநிலையான, குறைந்த சர்க்கரை மற்றும் குறைந்த சுத்திகரிக்கப்பட்ட கார்ப் கொண்ட உணவு, வழக்கமான உடற்பயிற்சி மூலம் இன்சுலின் உணர்திறனை மேம்படுத்துவது, 7-10% உடல் எடையை குறைத்தல், சர்க்கரை நிறைந்த பானங்கள், ஜங்க் உணவு, அதிக கொழுப்பு நிறைந்த உணவு போன்றவற்றைத் தவிர்ப்பது, இரத்த சர்க்கரை, கொலஸ்ட்ரால், இரத்த அழுத்தம் ஆகியவற்றை கட்டுப்பாட்டில் வைத்திருப்பது மற்றும் போதுமான அளவு தூக்கம், மனஅழுத்த மேலாண்மை போன்றவை முக்கியமானதாகும். இந்த வாழ்க்கைமுறை காரணிகளுடன் சேர்ந்து மஞ்சள் மற்றும் குர்குமின் இணைந்து முக்கிய துணையாக செயல்படுகின்றன.
பக்கவிளைவுகள்
மஞ்சள் மற்றும் குர்குமின் பொதுவாக பெரும்பாலான மக்களுக்கு பாதுகாப்பானவை தான், ஆனால் சிலருக்கு வயிற்று எரிச்சல், குமட்டல் அல்லது லேசான வயிற்றுப்போக்கு போன்ற சிறிய செரிமான பிரச்சினைகள் ஏற்படக்கூடும். ஆனால், இரத்தம் சம்பந்தப்பட்ட அல்லது கல்லீரல் சம்பந்தப்பட்ட மருந்துகள் எடுத்துக்கொள்வதாக இருந்தால், கர்ப்பமாக இருந்தால் அல்லது தாய்ப்பால் கொடுத்து வந்தால் அல்லது ஏற்கனவே கல்லீரல் நோய்க்கான சிகிச்சையில் இருந்தால், சப்ளிமெண்ட்களை தொடங்குவதற்கு முன் கண்டிப்பாக மருத்துவரின் ஆலோசனையை பெற வேண்டும்.
கனேடியர்களின் நிலைமைக்கு புலம்பெயர்ந்தோரை காரணம் காட்டும் அமெரிக்கா
